Nine Five Two

其實我好慶幸能夠親身經歷過短暫嘅大時代, 同時有機會面對最近嘅大跌市, 考驗一下自己應變能力同資產配置, 更加慶幸嘅係自己條底褲仲未被沖走, 算好好彩。

上星期五民生終於出左收購華富嘅細節, 聽日要爆升應該冇問題, 但係睇番同當初民銀國際(CMBCI)約定認購88億至133億華富股份, 最新嘅terms卻顯示佢只會認購88.7億股, 佔擴大股本後35.6%左右, 就咁睇民生係未能實現絕對控股。

或者有人擔心咁樣會唔會比之前差左, 仔細聽清楚細節, 原來CMBCI利用co-investors, 以較少資本, 實現槓桿控制華富, 同時亦可豐富investor base。

華富於完成併購後嘅股權分佈:

Vechicles	Investors	No. of shares	%
	Existing shareholders	1,510,198,540	6.1%
	option	48,348,867	0.2%
CMBCI	CMBC	8,867,256,637	35.6%
New Hope Global	vice chairman and non-executive director of CMBC	2,908,584,000	11.7%
United Energy International	United Energy Group	2,908,584,000	11.7%
Mind Power	Anbang Life Insurance	2,908,584,000	11.7%
China P&I Services	China Shipowners Mutual Assurance Association	1,450,000,000	5.8%
Good First International	50% held by non-executive director of CMBC	707,964,000	2.8%
Tisé Media Fund LP	Third party	700,000,000	2.8%
Novel Well Limited	Third party	700,000,000	2.8%
Insight Multi-Strategy Funds SPC for the account of Insight Phoenix Fund III SP	Third party	1,242,000,000	5.0%
Ristora Investments Limited	Third party	301,899,200	1.2%
Divine Unity	Third party	180,003,554	0.7%
China Alliance Properties	Fosun	180,000,000	0.7%
	employees of CMBCI	156,000,000	0.6%
King Ace	Quam Trustee	164,000,000	0.7%
Total		24,933,422,798	100.0%

根據通告, New Hope Global、United Energy International、Mind Power Investments Ltd. 各自已向CMBCI給予承諾書，使民銀國際可按其絕對酌情權，就​​它們各自持有之1,246,471,140股股份在華富國際任何股東大會上表決，有效期為完成交易之日起計一年。所以，CMBCI將控制經認購事項擴大之華富國際已發行股份約51%之表決權。

如此一來,民生就可以喺完成單deal一年內控股華富。另外co-investors 入面出現左anbang同fosun, 前者為民銀嘅最大股東, 後者就係買左club med嘅上海黃和, 可謂陣容強大。

通告亦都透露左華富應該要向投行之路進發, 可惜CICC暫未上市, 未能同佢個PB做比較, 簡單d用812黎做比較, PB 4.82, 即係imply華富可達HK$2.64。

順帶一提, 單deal其實仲有可多先決條件要過, 所以我決定聽日食少少先, 無論點, 到最後我都會留番5手左右, 做個紀念 (絕對係bias)。

雲峰

一講起虞峰(David Yu)，自自然然就會諗起馬雲(Jack Ma)，佢地兩個喺唔同領域各領風騷，你有你嘅focus media, 我有我嘅alibaba，大家各行其道，而雲峰基金(Yunfeng Capital)嘅創立，正正聯合左兩人嘅人脈、資金同市場觸角。

香港創仔正正有一隻股係搵到雲峰嘅影子，佢就係林建岳嘅寰亞傳媒(8075.hk)，集團主要經營電影製作，投資下演唱會咁，盤數同好多做影視娛樂嘅公司差唔多，都係連年虧損，雲峰當年投資入去，估計都係為左策略性地爭取中國同香港嘅傳媒市場。

最近寰亞有單公告，內容如下：

嗯...業務伙伴，另我忽發奇想，會唔會就係聯合阿里爸爸旗下嘅音樂公司呢？我咁諗其實係因為阿里爸爸同雲峰基金好多時都一齊出手，例如最近升到傻左嘅阿里健康(241.hk)，雖然用嘅係fund II, third party money 比較多，而fund I(即係投資寰亞嗰隻) 就主要係自己友，不過都無礙雙方合作嘅可能性，依家凡係同BAT有少少憧憬，Ｄ股價都會爆上。

有fd問我，咁係唔係可以ＡＬＬ　ＩＮ？即係咁，呢d創仔成交唔多，背後股權鬆散，波幅又大，再加上注碼應該好好分配，ＡＬＬ　ＩＮ我個人唔係太接受到，而寰亞幾日後就除權供股，新手避得就避，量力而為啦。


題外話，話說市面上好多人吹華富(952.hk) 會係繼敦沛、新鴻基同時富之後賣盤嘅本地券商熱門之一，上星期停牌以為好事近，但最後令人空歡喜一場。覆牌公告如下:

本公司於今日發放了一份新聞稿，內容有關華富嘉洛證券有限公司(本公司間接全資附屬公 司) 於二零一五年四月十六日與東海期貨有限責任公司簽立營銷互惠合作協議，以發展本集團期貨業務。除新聞稿所披露者外，本公司概無額外資訊盼股東或潛在股東垂注，且亦不認為該新聞稿載有內幕消息。

原來只係澄清份新聞稿冇引起股東或潛在股東垂注，但係轉個頭諗，佢其實都冇否認過與潛在股東磋商賣盤呢個可能性，呢份公告看似此地無銀，952故事絕對未完！繼續關注啦！

賽特賣盤了嗎?

朋友琴晚凌晨突然打比我,話發現到中國賽特(153.HK) 嘅大股東變左做咩Shangdong Iron & Steel Group Co., Ltd. 好雀躍咁問我係唔係賣左盤。我打開個權益披露,望兩望, 就同佢講: 你食詐糊喇!

冇錯, Shangdong Iron & Steel Group Co., Ltd. 的確係喺上海上市嘅山東鋼鐵(600022.ss), 加上賽特主營鋼結構同預製構件, 成個故事好似好靚仔又好合理咁, 可惜其實係一場美麗的誤會, 反而, 我有D驚驚地添。

首先講下點解無啦啦殺出左隻山東鋼鐵, 其實唔難, 因為山東鋼鐵就係齊魯証券(Qilu Securities Co., Ltd.)嘅控股股東, 完!

其實未完, 睇番上圖先, 我地由底睇上去, 蔣建強('強哥')經過建瑞('Keen Luck')呢個BVI殼實現對賽特嘅絕對控股。喺2014年8月, 建瑞將持股放入Sun Securities (上圖冇顯示), 2014年11月,再射倉或抵押比VMS Secuirties, 而董身達(達哥同時亦擁有VMS Private Investment Partners II Ltd, 絕對有理由推斷出達哥同VMS關係非淺)控股嘅Wisdom Bright應該就係代理人, 其後, 持倉再被轉移到齊魯, 由於山東鋼鐵係齊魯控股股東, 所以披露文件就見到達哥同山東鋼鐵嘅一出一入, 講左咁耐,強哥其實係一股都冇放過。

咁我又驚咩呢, 因為射得入齊魯嘅, 多數有動作。以其他公司嘅情況做参考,發覺齊魯分工都分得幾明確下, 唔同Subsidiary做唔同種類嘅corporate actions, 而賽特用緊隻 Qilu International Investment Ltd. 就exactly係東吳水泥嗰隻, 由此推測, 唔通賽特將會做PP?!

天年生物 (1178.HK)	Qilu International Capital Ltd.	Open Offer
宏太控股 (1400.HK)	Qilu International Wealth Mgt., Ltd.	Share Pledge
東吳水泥 (695.HK)	Qilu International Investment Ltd.	Private Placement
海通國際 (665.HK)	Qilu International Securities Ltd.	Right Issue
中國賽特 (153.HK)	Qilu International Investment Ltd.	Private Placement??

根據最新一年嘅Annual result, 賽特2014年尾現金有人仔(下同)6.26億, 黎緊除左要派0.3億股息之外, 仲有可能要支付一筆收購江蘇晨力環保科技有限公司('晨力環保')。根據港交所嘅披露文件, 淨係知道佢會向兩名個人收購晨力環保, 付款方式待定:

中國賽特集團有限公司（「本公司」，連同其附屬公司統稱「本集團」）董事（「董事」）會（「董事會」）宣佈，於2015年1月27日，本公司一家全資附屬公司（「買方」）作為買方、兩名個人 （均為中華人民共和國（「中國」）居民及獨立於本公司的第三方，統稱「賣方」）作為賣方及 於中國成立的一家公司江蘇晨力環保科技有限公司（「目標公司」）訂立諒解備忘錄（「諒解 備忘錄」），內容有關建議收購（「建議收購事項」）目標公司的51%股權（「目標權益」）。

經本人搜尋之下就發現晨力環保嘅股東只有兩位, 分別係徐芳華同埋蘆衛娟, 分別佔晨力環保嘅54.3%同45.7%。晨力環保前身係江蘇晨力實業有限公司, 1991年已經開始運行, 2012年註冊資本為6100萬, 保守假設兩位嘅退出回報為一倍同埋用現金找數, 賽特需要支付6200萬 (個人認為其實會比呢個數更高), 對於賽特黎講可能係濕濕碎, 睇落冇乜需要集資。

然而, 賽特嘅trade/account receivable 増長非常驚人, 導致今年OCF大幅回落, 上年派息曾經延遲, 今年派息都其實講緊係6月嘅事, 加上佢嘅subsidiary其實面對一堆官司(暫未有時間研究), 種種跡象話比我知, 對住呢隻野絕對要有所保留。

不過, 睇番佢同上海城建嘅合作, 原來已經有著落,開緊工, 令我最憧憬嘅其實係佢地有機會互相持股, 如果係堅嘅話, 到時就不得了喇~

Cap水王

永義實業(616.hk)二月初發布左一份股份重組同供股嘅通告，內容大致係：

1) 股本先20合1
2) 調整股份後1供20

朋友間就討論咁最後姐係幾多股供幾多? 綜合得來有以下幾個答案，你又覺得係邊個呢?

a) 1供20
b) 1供400
c) 1供1



當然，呢啲財技嘅野對高手黎講濕濕碎啦，而對於某啲投機性散户黎講或者係無關重要，你問我點解要咁執著呢？因為我覺得識睇通告對於投資者黎講係必須，特別係有心做功課o個批，所謂差之毫厘，謬以千里，少少嘅錯誤已經足以影響你對間公司嘅估值。

後話: 呢隻616起我眼中係一隻世紀大伏股（或者係以我嘅能力黎講，勝算係零)，絕對唔建議沾手lol。


















答案：

其實只要明白合股係唔會影響總股本價值，就唔會中計。

a) 最合理嘅講法
b) 計錯數
c) 如果你話1股未合併股份供1股已調整股份，都算過關嘅，不過好少人會咁講

新一年!

2014眨眼就過左, 雖然埋單都有6隻股票止蝕離場,但全年都有正面回報,算係咁啦。

蝕錢既其中一隻係中國賽特(00153.HK), 0.8 止蝕離場, 不過最近我又唔忿氣, 0.61 開始吸納, 點知升下升下就0.7, 就咁睇基本面已經相當吸引,加上2014整年下趺近一半, 近一個月成交明顯增強, 未來應有一番作為! (希望係偏好啦! 哈哈)

媒體的迷思

上一次話會提早加息，今次突然會話延遲加息；

上個月話就快會開通，今日又話要擱置，瞓醒教又突然話你知下星期就開通

一堆又一堆既「今天的我打倒昨天的我」，令人摸不著頭腦，然而，呢個就係瞬息萬變既社會，每一秒都有可能改變。

為左掌握時勢，以不至於落後於他人，我都會利用各種平台睇新聞、文章、評論等等。但係現時媒體多不勝數，資訊氾濫，反而會令事件的真相變得模糊，對自己做成不便。

所以要搵到可靠既媒體或資料來源，係非常之重要，對於我呢Ｄ成日運用資訊既人，就更加不可或缺。

淺談飛毛腿盈喜

因應近年的智能手機熱，從事手機、平板電腦及數碼類電子產品所用之鋰離子電池模組的製造商飛毛腿(1399.HK)　股價由年初低位拾級而上，加上盈喜照耀，在公布業績前更以1.4的新高收市。

在8月4日公布的盈喜公告中，其中的一段如下：「僅根據初步評估（有待最終釐定），本公司預期本集團截至二零一四年六月三十日止六個月之純利將至少為二零一三年同期之四倍。」

綠色的一句為整份公告的核心，半年純利至少為上一年同期的四倍！可是看一看8月18日的成績表(下表)，卻發現權益持有人應佔溢利僅上升了161.6%，而盈喜所指的300%增長，相信是整體期內溢利（純利）。由於純利並沒有扣除飛毛腿旗下附屬公司少數權益的盈利或虧損，所以是沒有指標性的。某程度來說，投資者是被擺了一道。


飛毛腿半年財務報表(Extract)

	1H/ 2014	1H/ 2013	按年增長
	人民幣千元	人民幣千元
持續經營業務：
營業額	1,336,455	1,015,761	31.6%
經營溢利	64,207	32,546	97.3%
本公司權益持有人應佔溢利	35,501	18,783	89.0%
每股基本盈利（人民幣分）	3.44	1.82	89.0%
持續及已終止經營業務：
期內溢利	28,109	6,962	303.7%
本公司權益持有人應佔溢利	30,214	11,550	161.6%
每股基本盈利（人民幣分）	2.93	1.12	161.6%

資料來源：　飛毛腿年報

相反，應被看重的持續經營業務的應佔溢利只增長了89%，一個這樣的落差做成翌日飛毛腿的股價立刻下跌。

由於現時盈喜盈警沒有官方的格式，也沒有一定的監管，當中不乏內容空洞、以偏概全，甚至具有誤導成份的。投資者對這些盈喜盈警還是切忌太認真，以免招來無謂損失。